اكتر 8 أعذار (تلكيكات) علشان ما تروحش الجيم - يلافورما
الرئيسية » تمارين لياقة » اكتر 8 أعذار (تلكيكات) علشان ما تروحش الجيم

اكتر 8 أعذار (تلكيكات) علشان ما تروحش الجيم

انت مش حتصل على نتائج طول ما انت بتفوت التدريب، ما فيش أعذار يا فورما!

علشان تكون فى الفورما انت محتاج تكرس وقت للتدريب وتلتزم بالبرنامج اللى انت بتتبعه، واول ما تحدد شوية من اهدافك، المفروض يكون سهل عليك انك تروح الجيم بأنتظام، مش كده؟

بس فى الحقيقة الكلام اسهل من الفعل!

8 أعذار (تلكيكات) علشان ما تروحش الجيم

  • لازم تبدأ من الأول

عذر (تلكيكة)#1: أنت بوظت الرجيم فى النص وأنت عايز تستنى لحد يوم الأحد او لحد اول يوم فى الشهر، علشان تبدأ تانى من الأول.

قعدت تأكل بيتزا وتشرب صودا بدل ما تتبع الدايت بتاعك، وبتقول تانى يوم ان انت لسه محتاج ايام او اسابيع زيادة ما تتبعش فيها الدايت، على اساس ان مافيش اى برنامج كويس او فعال يبدأ فى وسط الأسبوع او الشهر، مش كده؟

الحل: ما تبوظش الدنيا اكتر

صعب اقوى انك تعوض الأيام والأسابيع اللى انت ما تمرنتش فيهم ولا اتبعت الدايت، لو انت عملت حاجة ضد الدايت، اقبلها وعديها، المهم انك ترجع تانى للطريق الصحيح فى اقرب وقت، ما تستناش لحد اول الأسبوع أو اول الشهر، لان مافيش حاجة اسمها كده.

عذر (تلكيكة)#2: الأرتباط بيشغلك عن التدريب

بيجى وقت فى اى علاقة، تلاقى ان شريك حياتك بيشغلك عن اهدافك الرياضية، واحنا فاهمين الموضوع، لأنه سهل اقوى انك تفضل تخرج مع شريك حياتك بدل ما تروح الجيم، واصبح الخروج له أولوية عن الجيم.

الحل: اتكلم فى الموضوع مع شريك حياتك واكيد هيقدرك.

خلى فى تواصل مع شريك حياتك، وقول لشريك حياتك بوضوح ليه مهم اوى انك تلتزم بالبرنامج الرياضى وبالدايت، ممكن كمان تخلى شريك حياتك يروح معاك الجيم، واعملوا نفس الروتين مع بعض (خلى بالك ما تخليهاش ترفع weight زيك راعى انها بنت، هو فى بنات شديدة صحيح وعضلاتها تقدر تستحمل رفع الاوزان بس مش كلهم، فخلى بالك من النقطة دى يا فورما)...

اصل الماتش شغال!!

عذر (تلكيكة)#3: فى ماتش مهم قوى، مش ممكن تفوته.

فريقك المفضل بيلعب النهاردة، المباراة مهمه ومستحيل تفوت اى لحظة من المباراة، فإزاي تقدر تكون فى الجيم وتكون قلقان على الدايت، وأنت مخك فى حتة تانية خالص عايز تروح البيت او تقعد على القهوة وتشرب صودا وتاكل سناكس وتشجع فريقك؟ إزاي تكون مشجع اصيل للفريق وتسيب الماتش شغال وتروح الجيم علشان تلعب 45 دقيقة على الـelliptical؟ لو انت فعلاً اخدت قرار ضد الفريق وروحت اتمرنت، حتقول انت السبب ان الفريق خسر المباراة علشان انت ما تفرجتش وشجعتهم، مش كده؟

الحل: أتفرج على الماتش ولا تزعل نفسك!

ما حدش بيقترح انك تفوت الماتش، عادى اتفرج واتهنا يا فورما، بس المفروض تخطط لأدام، انت طبعاً بتكون عارف مواعيد المباريات، وعلى الأساس ده شوف حتتمرن امتى فى ايام الأجازة ولا الصبح، ولو انت حتتفرج على القهوة، حاول تخلى اليوم ده هو يوم الفرى بتاعك او لو مش اليوم الفرى ممكن تاخد قرارت حكيمة وتقلل من الخروج عن الدايت، يعنى معظم الأماكن بيكون عندها فى المينيو ساندويتش فراخ مشوية ياريت تطلبه بدل البيتزا.

  • بلاش كسل

عذر (تلكيكة) #4: انت تعبان او ضعيف، وانت مش مضايق من الموضوع ده.

أنت عندك لسته طويلة من الأعذار المقبولة (بالنسبالك انت)، علشان ما تروحش للجيم، اعذار زى دول مثلاً؟ الوقت متأخر… الوقت بدرى… الدنيا برد قوى برة… الدنيا حر النهاردة… الجيم مليان ناس النهاردة، الأعذار دى، يا فورما، ضعيفة قوى، دى اعذار انت بتقولها علشان انت كسلان.

الحل: خد لحظة علشان تتفتكر انت ليه اصلا بتتمرن.

ايه الحصل للأهداف اللى انت حددتها علشان تحققها؟ ما تفضلش من غير هدف، اجمد كده وشد حيلك وقوم من على الكنبة وروح الجيم.


التعليقات

التعليقات

الصعود لأعلى