إزاي تتابع تقدمك يا فورما!! - يلافورما
الرئيسية » تمارين لياقة » إزاي تتابع تقدمك يا فورما!!

إزاي تتابع تقدمك يا فورما!!

إزاي تتابع تقدمك يا فورما!!

زمان، كنا بنعمل دايت بس علشان نخس، فكل اللى كنا محتاجينوا هو الميزان علشان نعرف احنا خسنا اد ايه، بس لو أنت اتبعت الدايت بس، أنت مش بس حتنقص وزنك ده أنت كمان حتخسر دهون وعضلات، اللى ممكن تسببلك مشاكل صحية بعدين، علشان كده الدايت لوحده مش كفاية، أنت محتاج للرياضة كمان علشان تخلى شكلك حلو وتثق بنفسك، بس الرياضة بتساوى عضلات والعضلات يعنى زيادة فى الوزن على الميزان، طب حتابع تقدمك إزاى؟

يلافورما جابتلك كذا طريقة علشان تتابع تقدمك على حسب هدفك:

 
  • صور نفسك يا فورما: الطريقة دى مش بس حتخليك تتابع تقدمك، دى كمان حتديك الحافز علشان تكمل، كل أسبوع ألبس لبسك الرياضى وصور نفسك صورة كاملة (من ادام ومن الجنب)، ما تعملش اى حاجة فى الصور ولا تلعب فيها، أنت محتاج الصور تكون زى الحقيقية، علشان تشوف تقدمك، قارن الصور القديمة بالجديده.
  • استخدم متر القياس: خلى متر القياس دليلك، قيس دراعك وصدرك ووسطك والمؤخرة (زى ما بتأخد مقاساتك لتفصيل اللبس) وأكتب الأرقام كل أسبوعين.
  • لو أنت عايز تخس، المفروض الأرقام تنقص.
  • لو أنت عايز تزود وزنك، المفروض الأرقام تزيد.
  • ميزان بيقيس دهون الجسم: الميزان ده حيقولك وزنك فيه اد ايه دهون واد ايه عضلات وعضم ومية، اتاكد وأنك بتقيس وزنك كل يوم فى نفس المعاد وأنت بتستخدم الميزان ده علشان المية اللى فى الجسم بتتغير على مدار اليوم، يفضل أنك تقيس وزنك الصبح قبل الفطار.

لما تركز قوى على أنك تتابع تقدمك ممكن يخلى اللياقة تصعب عليك، خصوصاً لما يكون مشوارك طويل، كل اللى أنت محتاجة انك تروح الجيم/ تتمرن فى البيت كل يوم، وعلى فترات بعيدة تابع تقدمك وشوف انت قربت لهدفك ولا لأ، بس لو أنت من الناس اللى بيتحفزوا لما يشوفوا الأرقام بتقلل أو بتزيد، يبقى جرب متر القياس أو الميزان اللى بيقيس دهون الجسم.

أفتكر دايماً يا فورما ان اى حاجة أنت بتعملها وكل اختيار إجابى انت اخذته وكل سيشن أنت اتمرنته مش حيضيع وحتلاقى نتيجة تعبك.


التعليقات

التعليقات

الصعود لأعلى